Li maron

Nouvelle de Paul Henri Thomsin, publiée dans "Le Vlan" et reproduite ici avec l'aimable autorisation de l'auteur

Li maron
Vochal riv'nou li tins dès marons...
Li fâve qui dji v'va raconter a-st-ataké divant guére divins on p'tit viyèdje di nosse hèsbaye...
C'èst la adlé sès grands-parints, qu'on p'tit-efant del vèye passéve tos sès condjis...

C'èst di la qui l'gamin d'apreume cwatre-ans, nin co pus hôt qu'on fier di stoûve, aveût raminé'ne pougnêye di sâvadjes marons, po lès apwertér ès scole, bon qu'on n'djâzéve qui d'çoula...

çou qu'lès parints d'lèfan ni s'dotît nin, c'èst qui nosse curieûs pitit cârpê âreut bin voulou savu s'on n'lî racontéve nin dès boûdes, parèt.

Adon, c'è-st-insi qui, sins rin dîre a nolu, il aveût stu mète ine cacogne è tére, è plin mitan d'on cwâré âs lègumes qui s'papa féve po passer s'tins...

Liviér passa...

On prétins riv'na...

C'èst l'papa qui fa'ne drole di tièsse, cwant-i vèya qu'on drole di "stitcha" avaût crèhou, inte lès dièrins porês èt lès prumîrès mâles jèbes.

I fourit pôr tot maké, â moumint qu'i vola râyî l'afêre.

Bin awè!  Nosse pitit pièle èsteût-st-a l'awête!

I brèya si télmint fwért qui s'papa'ne sogne èt qui...

Po rapâfter si p'tit tigneûs d'fi, leya li "stitcha" è pièce...

I s'dotéve bin pô qui...

Avou les-annêyes, li fameûs stitcha div'na todi on pus grand.

Todi on pô pus fwért.  Todi on pô pus...

Avou l'tins, i s'candja minme a maronî.

Qui v'sonle-t-i, don vos?

E plin mitan dè corti, s'i v'plèt!

Qui l'papa n'pola bin vite pus mète nou lègume, câse qu'i n'avît pus dèl loumîre assez!

C'è-st-adon qui l'ome mèta sès ponnes âs pîds dè bon Diu, qu'i r'toûrna s'tére, ine dièrinne fèye, èt qu'i sèma dè wazon...

S'il avasse todi savu, lu, ci p'tit maron la, qu'il aléve loukî so l'dèstinêye di tote ine famile...

In-an après l'ôte, il a vèyou crèhe l'èfant qui l'aveût mètou è tére...

In-an après l'ôte, il a vèyou lès parints rotrt todi pus reûs, so l'vôye dès pleûs è vizèdje...

Il a catchî lès prumîres hant'reyes dè ci qui l'aveût si bin disfindou...

C'èst lu qua metou l'vile mame a houte d'on franc solo, la qu'èle vinéve fé'ne pitite sokète, dizos sès grantès foyes...

C'èst lu qui sét tot diçou qui s'a passé è manèdje: lès rîres tot fî parèy qui lès lâmes, lès can'dôzrèyes tot fî parèy qui les côps d'gueûye...

I sét tot, lu, mins s'na-t-i mâ rin dit!

Il a tot vèyou, lu, mins s'n'a-t-i mây rin volou candji!

Oûy, po lès p'tits-èfants, on lî a mètou 'ne cabalance, al pu basse di sès cohes...

Dimins, sès "mèsses" ènn'îrons mins, lu, sèrè-t-itodi la, po loukî so lès jènè râcions a v'ni...

Si lès vis-âbes polît djâzer
Et fé savu çou qu'l'ont vèyou,
Mutwèt qui l'ome tom'reût so s'cou,
D'aprinde lès frawes qu'ont f^t s'passé

Retrouvez Paul Henri Thomsin chaque semaine dans le Vlan et aussi dans ses ouvrages, publiés chez Noir Dessin Production