Freûd d'bot'roûle

Ces derniers temps nous avons eu beaucoup de travail au jardin, la construction des nouveaux bacs, la préparation des portes ouvertes etc...

Donc une fois de plus le blog s'en est ressenti

Je reviens donc avec ce billet de circonstance de P H Thomsin  

 Source image, Internet (si vous possédez un droit sur cette image et que vous vous opposiez à sa publication, un petit mail et elle sera retirée)

Freûd d’ bot’roûle

Meûs d’ djun ! L’ osté nos vint mostrer si vrêye vizèdje.

Li solo si fêt pus franc.

I n’ a qui lès «måy-contints» po trover qu’ i fêt trop tchôd.

Èt, di tote manîre, cès-la,  i fèt l’ hègne po tot èt po rin,

bon qu’ i s’ plindèt tot fî parèy, ine fèye qui nosse

solo si catche podrî ‘ne nûlêye...

Mi, po m’ pårt, dji n’ a måy rigrèté, seûye-t-i on bleû cîr,

seûye-t-i ‘ne doûce tchôleûr...

 Çou qui m’ mète pôr so l’ houp’diguèt,

mi, è meûs d’ djun, c’ èst qui lès feumes sont todi pus bèles.

Siya, siya !

Bin awè ! Come di djusse, èle ni loukèt nin a ‘ne djèye po lèyî veûy leûs djambes, leûs brès’, leû... Leû «rondeûrs», qwè !

La qu’ i lût lès cwate solos, èle n’ ont pus sogne dè haper on måva freûd... Adon,

po lès hanteûs a v’ni, qui n’ volèt nin, télefèye, atch’ter on tchèt divins on sètch,

c’ èst l’ moumint dè drovi leûs-oûy !

Èt mi, qui n’ a nin mès-oûy è m’ potche, dj’ ènnè profite po rascoyî m’ payèle di

bèlès-îmådjes !...

Ci n’ èst pûs, oûy, come divins l’ tins, parèt.

Dè tins di m’ grandmére, è l’ iviér come è l’ osté,

lès feumes tchåssît todi tofér li minme longue cote qui pindéve disqu’ al tére,

si mètît on fichu so leû tièsse, èt s’ ni vèyéve-t-on wêre qui l’ bètchète di leû narène !

Asteûre, c’ èst tot-ôte tchwè.

Dji n’ vis såreû dîre pocwè (mutwèt cåse qui lès moussemints sont todi pus tchîrs), mins çou qu’ èst sûr, c’ èst qui lès feumes si moussèt todi pus coûrt !

Lès cotes qui pindît so lès solés ont racoûrci,

come s’ on l’s-avasse bouwé trop tchôd!

Avou on trop tchôd solo, télefèye !

Èt, fåt creûre qu’ on l’s-a pôr bouwé, ine bèle hope di fèyes,

al copète dè martchî, pace qu’ èle ni ravizèt torade pus qu’ on norèt d’ potche !...

I fourit l’ tins qu’ on ‘lzî vèyéve djusse lès pîds èt on pô pus’, a nos binamêyes.

 I fourit l’ tins qu’ on ‘lzî a mètou lès gngnos a l’êr. Asteûre,

i fåt bin loukî po veûy li coleûr dèl sitofe ! Awè mins ci n’ èst rin, çoula...

Vola qu’ èle si mètèt pôr a bouwer l’ hôt ossi tchôd qui l’ bas !

Come si nos n’ avîs nin co assez dè taper nos-oûy so leûs djambes èt so leûs brès’, ni vola-t-i nin qu’ èle nos fèt pôr veûy leûs stoumac’ !

Leû stoumac’ èt leû bot’roûle, s’ i v’ plêt !

Fåt-i nin assoti !

C’ èst, po l’ pus sûr, cåse di çoula qui lès-omes ont todi pus tchôd !...

Awè mins vola, parèt...

La qu’ èlle atrapît dèdja on måva freûd, å prumî p’tit côp d’ vint on pô pus fris’,

i n’ fåreût nin tot l’ minme, asteûre, qu’ èle hap’rît on freûd d’ bot’roûle !...

Vos lès vèyez, vos stchèrni dèl bot’roûle ?...

Èt adon, bon qui l’ tére si rèstchåfe, on pô pus’ tos l’ s-ans,

Dji so-st-a m’ dimander çou qu’ èlle åront co l’ has’ di r’côper,

Divins quéquès-annêyes !...

Cwant-èle ricôpèt leûs moussemints,

Èle ni s’ dotèt nin, lès feum’rèyes,

Qui l’ ome, sins rîre, fåt qu’ ènnè rèye

Po n’ nin passer po ‘n-ènocint.

 Billet de Paul Henry Thomsin, publié ici avec l'aimable autorisation de l'auteur.