Djàsans d'Amoûr (Constant Dehousse)

Djàser d'amoûr c'est si plaihant
L'on l'aute, à l'orèye on s'raconte
Des saqwès qu'rindet trèfilant
Des saqwès qu'sont vîs come li monde
Avou l'bonasté d'ses vingt ans
On s'dit des mots, tofer les minmes
On s'amûse à s'ridîre "dji v's inme"
Minme s'on l'a dit'ne munute divant!

Djàser d'amoûr
Coulà n'dimande nole loquince
C'est lèyî s'coûr
Dire çou qu'i r'sint tot come el pinse
Djàser d'amoûr
C'est qu'équ'feye' clôre les pàpîres
Et d'mani longtimp sins rin dîre
Djàser d'amoûr...

Djàser d'amoûr, c'est sprinde po l'main,
C'est strinde ine taye divins ses brès's
C'est s'murer d'vins deûx oûy's longtimp,
C'est mète si àme divins 'ne caresse.
Djàser d'amoûr, c'est fé l'calin,
C'est r'kwèri des p'titès catchètes
Po s'î d'ner des bàhes à picètes
Qu'on n'si wez'reut d'ner d'vant les d'jins!

Volà çou qu'c'est, djàser d'amoûr!
Asteûr qui vos l' savez, Nanète,
N'est-st-i nin timp qu'seûy' à nosse toûr
D'ennè djàser 'ne pitite miyète?
Vinez chal, à l'dilongue dè ri,
Nos nos catch'rans drî les bouhêyes
Et nos nos dîrans, m'binamêye,
Des saqwès qu' nos n'avans mày' dit!