Joyeux Noël à tous nos lecteurs

C'est avec ce billet de P H Thomsin, (publié avec l'aimable autorisation de l'auteur) que nous souhaitons à tous nos lecteurs et lectrices un très joyeux Noël

 

Nin dandjî, èdon...

 Lès fièsses abètchèt... Lîdje èst so dès tchôtès cindes èt s’ a

dèdja mètou so s’ trinte-deûs... Noyé èt novèl-an, ci n’ èst

qu’ ine fèye l’ an, parèt ! Dèdja qui, po l’ djoû d’ oûy, i fêt

målåhèye si bin plêre, on n’ va nin pôr fé l’ grigneûs... On va fé

djama !... Ci n’ èst nin l’ moumint di s’ lèver sins loukî s’ bot’roûle

!...

N’ av’ nin vèyou, chal èt la, lès loumîres qui blaw’tèt èt lès bèlès

vitrines ? N’ av’ nin oyou lès doûcès muzikes qu’ on gruzinêye, on

pô tot-avå lès rowes ? Si nosse bone vèye s’ a fêt gåye, c’ èst po v’

sètchî foû d’ vos brouheûrs, po v’ fé roûvî vos mèhins, po v’ rimète

li coûr al djôye. Lèyîz-v’ andoûler, adon. Dji sè: on n’ a pus rin po

rin, asteûre èt s’ ni va-t-on pôr pus nole på avou vint-eûros !...

Mins, po fé l’ fièsse, nin dandjî di taper lès-ouh foû po lès f’gnèsses

! Nin dandjî dè fé on hård è s’ boûsse. Nin dandjî di mète tot s’

boûre so s’ pan. I fåt djusse avu l’ has’ si s’ keûre deûs’ treûs pititès

brîhes, manîre di s’ candjî lès-îdèyes... Çou qui compte, c’ èst di n’

nin avu sogne di mète si coûr è coleûr. Coleûr di fièsse, come di

djusse ! Coleûr Noyé èt novèl-an !...

Li vrêye fièsse, c’ èst l’ cisse qu’ on-z-a la, å d’vins di s’ coûr èt

nin todi l’ cisse qu’ on fêt r’glati å-d’foû ! Â si, po ‘ne fèye a fé,

nos polîs ritrover l’ gos’ dèl vrêye fièsse ! Qui dè contrêre ! Po l’

djoû d’ oûy, s’ on n’ mète nin so l’ tåve champagne èt caviar, vos

dîrîz qui l’ fièsse n’ a pus nou sawoura. Si ç’ n’ èst nin målèreûs !

Totès-èmantcheûres dès botikîs, èdon çoula ! Èt, adon-pwis, Noyé

èt novèl-an ni sèrît-èle nin dès fièsses po tot l’ monde ? Fåt-i viker

so blancs peûs po-z-avu l’ dreût di s’ fé avu bon ou bin, minme, di

fé lès cwanses d’ avu bon ?...

Po fé fièsse, nin dandjî d’ on gros tchîr cadô. Nin dandjî d’ ine clapante

botèye. Nin dandjî di crås-amagnîs. Nin minme dandjî d’ on

grand sapin... Ci n’ èst nin l’ åbe qui fêt l’ Noyé, hin tot l’ minme !...

Cwand vos tûzez a tos cès-åbes la qu’ on mèsbrudjèye. Cwand vos

tûzez qui ci n’ èst todi qui po moussî avou totes sôrs di tchinis’.

Èt qu’ on lès va lèyî souwer so plèce. Èt qu’ on lès va fé mori. Èt

qu’ on lès va mète so l’ batch, come ine grosse «crasse», li djoû

qu’ atak’ront a piède leûs-awèyes... Nonna, nin dandjî di totes cès

couyonådes la po qui l’ fièsse åye ine åme di fièsse !...

Nèni, nonna ! Nin dandjî dè djouwer lès-amûzètes, al novèl-an ! Li

fièsse, lèy, on n’ lî broûle nin l’ oûy, come di djusse ! Èle sét bin la

qu’ èle pout aler... Èle sét bin la qu’ on l’ rawåde... Èle sét bin la qu’

on l’ va r’çûre sins fé dès-an’tchous... Adon, bone fièsse di Noyé a

vos-ôtes turtos !...

Li ci qui compte qui, po fé fièsse,

I fåt-st-alouwer ‘ne banse di brokes

Èt beûre disqu’ a bate li bèrloke,

Mi sonne-t-i qui c’ è-st-ine grosse bièsse.