mercredi 11 décembre 2013

On Barakî


Barakî...
Awè, lu, c’ è-st-on barakî...
On barakî po d’ bon ! Nin l’ barakî qui vos lî tapez l’ hate dissus,
bon qu’ i n’ èst nin prôpe sor lu,
qui n’ sét çou qu’ c’ èst qui d’ avu dès manîres
èt qui, å rés’, n’ a nole bone è cwér, savez...
Nonna ! Lu, si c’ è-ston barakî, on vrêye, c’ èst pace qui si grand-pére èsteût barakî èt qui s’ papa èsteût barakî tot parèy !
Dihez-m’ on pô... Qu’ åreût-i polou fé d’ ôte qui «barakî»,
dji v’s-èl dimande ?...
«Barakî», po cès djins la, c’ è-st-ine sacwè qu’ on-z-a-st-è coûr !
È l’ åme, awè ! Ine sacwè qui v’ coûrt divins vos vonnes èt qui v’ rimowe lès tripes ! Lu, il a v’nou å monde divins ‘ne roulote èt c’ èst divins ‘ne roulote qu’ i lêrè sès hozètes ! Awè, divins çou qu’ i lome «si mohone».
 Avou totes lès-ahèsses qui vos pôrîz sondjî.
 A ‘ne pihêye dèl grande teûle, la wice qu’ i mète li coûr dès-èfants
al djôye...
Cisse grande teûle la qu’ i fåt dismantchî èt rèmantchî,
pus d’ vint fèyes so in-an. Tot-avå èt tot l’ minme wice, pôr... Cisse
grande teûle la, c’ èst tote si vèye, a nosse barakî !...
Cisse grande teûle la, c’ èst l’ cîr d’ a nosse barakî èt lès mèyes di loumîres
tot-åtoû èt tot-avå, c’ è-st-ot’tant di steûles !... Dès steûles po
fé blaw’ter sès nut’... Dès solos, po fé blaw’ter sès djoûs. Po fé
blaw’ter sès sondjes, télefèye !...
Si no ? Dji n’ vis-èl såreû dîre... Lu, on l’ lome «Gugusse», li ci
qui fêt l’ zozo... Ou bin «Zozo», adon qui fêt l’ gugusse... Çou qui
compte, por lu, c’ èst dè veûy lès-èfants qui trèfilèt, divant d’ intrer.
C’ èst l’ tchôde sinteûr dès crèsses di bwès qu’ on-z-a-ståré so l’
pisse. C’ èst l’ muzike èt lès rôl’mints dè tabeûr... Lès hihåhås dèsèfants
èt leûs p’titès mins qui batèt d’ boneûr... Qu’ i-n-a-t-i d’ pus
bê qu’ in-èfant qui rèye, dihez-m’ on pô ? ...
C’ èst por zèls qui nosse «barakî» passe li pus gros di s’ djoûrnêye,
divant s’ mureû. A tchåssî s’ vète pèrike. A s’ fé ‘ne grosse rodje
barène. A s’ mète totes sôrs di coleûrs, so s’ vizèdje. A s’ moussî
avou ‘ne vîle frake a tape-cou. Ine vîle frake tote kitrawêye èt on
pantalon tot rapècî, qu’ on mèt’reût d’vins treûs parèy qui lu. Adon
n’ fåt-i nin roûvî lès burtèles, èt l’ tchapê boule, èt lès solés d’ on
d’mèy mète di long, èt...
Vo-l’-la prèt’ ! Divins deûs munutes, ci sèrè-st-a lu !... Èt adon, plèce
ås cåbriyoles èt ås coupèrous. I s’ va falu trèbouhî, èt toumer so s’
cou, èt s’ rôler al tére a s’ sipråtchî l’ bot’roûle, èt... Èt si fé passer
po on... Po on boubiè ! Po on d’mèy doûs, mutwèt ! Po... Po fé rîre
lès-èfants, come di djusse !...
«Barakî»... Qué bê mèstî !...

Pocwè si foute dès barakîs,
Dès p’titès djins ou dès cinsîs ?
Bin fé l’ ovrèdje n’ èst nou pètchî
Èt s’ n’ a-t-i pôr nou sot mèstî.

 Nouvelle de Paul Henri Thomsin, publiée avec l'aimable autorisation de l'auteur
Photo d'illustration, Achille Zavata (source Internet)

Aucun commentaire: