Rin qu’ leûs-oûy

Rin qu’ leûs-oûy

 s’ ont k’nohou, i-n-a passé swèssante ans d’ chal... 

On sèm’di...

C’ èsteût bal å viyèdje... Èlle aveût vint-ans èt, lu, a hipe on pô

pus’...

 Èlle aveût mètou li bèle bleûve rôbe qui s mame lî aveût

fêt... I s’ aveût mètou so s’ trinte-deûs... Il ont dansé leû deûs... Ine

fèye ou deûs èt... 

Èt s’ broûlît-i dèdja onk po l’ ôte...

Dè tins qu’ i hantît, on lès louméve «lès lètchås».

 Bin awè ! I n’èstît måy qu’ a s’ rabrèssî ! Vos n’ lès-årîz måy polou veûy, treûs

munutes èn-è-rote, sins qu’ i n’ si tchouftèsse.

 Minme qui lès mames si fît dès mås d’ tièsse, come di djusse ! 

Vos savez bin çou qu’ c’ èst, èdon: ine djône fèye ni s’ deût nin lèyî adûzer, divant di

s’ marier, èt... 

Ci sèreût pôr honteûs d’ avu ‘ne hoûzêye bot’roûle,

po tchåssî s’ blanke cote !...  

Èt cès deûs colons la qu’ ont l’ êr qu’ i n’ si djinnèt nin po djouwer avou l’ feû...

I n’ s’ ont nin broûlé, portant, mins ci fourit tot djusse tot l’ minme!

I s’ ont marié, è meûs d’ djun èt ont-i avu leû prumî r’djèton, è

meûs d’ avri di l’ annêye d’ après !... 

 Ouf !... Èt s’ ènn’ ont-i co avu cwate, après côp... 

Todi a cabasse, onk avou l’ ôte, todi «pindou»

onk a l’ ôte, todi tofér a s’ «lètchî», i n’ avît rin pièrdou di leûs

«tcholeûrs»... A s’ dimander kimint qu’ i n’ ont nin alouwé leû boke

èt leûs tchifes, al longue dè tins !...

Swèssante ans pus tård, lès deûs colons ont pièrdou tot plin di

leûs-èhowes, èt leûs vizèdjes ont gangnî tot plin dès pleûs ! So

çoula près, lès coûrs broûlèt co todi, onk po l’ ôte... Oûy, la qu’

nos deûs «vîs» rotèt a cabasse, c’ èst po n’ nin toumer ! Oûy, i n’

si båhèt pus qui deûs fèyes li djoû: l’ å-matin, atot s’ lèvant, èt l’

al-nut’, divant di s’ aler coûkî. Vos dîrîz qui leûs totès cafougnêyès

bokes sont-st-a coûrt d’ alène. Oûy, i n’ si djåzèt pus wêre qui po s’

dimander l’ eûre èt trover qui l’ tins n’ passe nin, èt... Èt ça fêt bin

dè tins qu’ i n’ ont pus lèyî hiper nou «dji v’s-inme», mins...

Mins, leûs-oûy ni s’ cwitèt pus qui po s’ sèrer, å moumint qu’ i s’

èssok’tèt... Leûs-oûy blaw’tèt... Leûs-oûy broûlèt !... Leûs-oûy blamèt,

awè ! Pace qui... Pace qui leûs-oûy si djåzèt, zèls ! Leûs-oûy si

d’hèt tote li djôye qu’ il ont d’ èsse co todi la, onk avou l’ ôte. Adon,

leûs-oûy si rabrèssèt. Leûs-oûy si «lètchèt»... Come divins l’ tins !...

Adon, c’ è-st-insi qui, sins moti, rin qu’ avou leûs-oûy, i comprindèt

qui l’ tins n’ a nin polou rafacer leûs «fougues» ! Qui l’ tins n’ a nin

tot-a fêt lèyî leû djônèsse å rés’... Qu’ i n’ sont nin co «vîs» !...

La qui l’ cwér dimane boke cozowe,

Cåse qui l’ djône tins a rèvolé

Èt qui l’ dèzîr s’ a-st-èssok’té,

Lès-oûy fèt r’glati vos-èhowes

Nouvelle de Paul Henri Thomsin

Publiée avec l'aimable autorisation de l'auteur