Pove mi cowe

I fêt neûre nut’, so Lîdje...

Nole loum’rote ås f’gnèsses, ni sèreûtç qui po v’ fé savu la qu’ vos mètez vos pîds...

Nin ‘ne pèlêye siteûle po fé r’glati lès teûts...

Neûr èt freûd, al copète dè martchî...

Hagnant ! Minme qui lès bleûvès pîres fèt l’ hègne, di sogne

di s’ fé cwahî è deûs...

Nin on tchèt avå lès vôyes... I fêt si tél’mint spès qui minme on marcou n’ î veûreût gote...

Nin on tchèt vis-adj’ dit...

Nou tchin nin pus, å rés’... Bin malènes, lès bièsses...

Èt bin malins lès djins: i n’ ont bin wåde di mète foû, ni sèreût-ç’ qui l’

bètchète di leû narène... N’ a nouk !...

Nouk !... Qwè ?... Ci n’ èst nin possibe tot l’ minme !... Bin siya !...

Dji n’ veû nin bablou, portant... Loukîz... La... La !... Å pîd di nosse

Pèron... Fåt-i nin assoti !... Deûs djints... Deûs droles di djints... Èt

‘ne drole di bièsse, al copète dè martchî... Treûs spérs, télefèye...

On vî ome, tot bahou... Moussî avou dès droles di clicotes... Qu’ a,

come quî dîreût, on bonèt d’ èvèke so s’ tièsse èt grande cane, è s’

dreûte min... Èt, a costé d’ lu, on... Awè, on tot vî ågne... Qui pwète

deûs grozès pèzantès banses so sès rins... Èt l’ treûzinme, lu...

Achou al tére... On neûr «diâle»... Neûr come gayète... Ossi neûr

qui l’ nut’... Co pus neûr qui sès-îdèyes...

C’ èst bon qui dji n’ î creû pus, mins vos dîrîz torade Sint Nicolèy

èt Hanscroufe... Bin awè, c’ èst l’ såhon po lès veûy avå lès vôyes,

come di djusse... Mins qui fèt-i la, sins bodjî ? Sins moti ? Come...

Come dès posteûres... Parèy qui dès cis qui n’ ont ni pièrdou, ni

gangnî ou bin qui n’ savèt wice va-s’...

Qui fèt-i la ?... I rawårdèt qui l’ pôve mi cowe di Hanscroufe åye

rissouwer sès-oûy... I rawårdèt qui l’ ome åye ritrové on pô d’

èhowe po s’ rimète a fé s’ djoûrnêye, pace qui... Pace qui, vèyez-v’, i

tchoûle, nosse Hanscroufe... I tchoûle a n’ si poleûr ravu... I tchoûle

come ci n’ èst nin possibe, dispôy on gros meûs... Dispôy qui dès

«sincieûs» qu’ ovrèt-st-a l’ Eûrôpe s’ ont mètou èl tièsse di lî wèster

l’ vèye... Dispôy qu’ i s’ ont comptés pus sûtis qu’ tot l’ monde,

atot fant creûre ås-èfants qui Hanscroufe, c’ è-st-in-èsclåve, cåse

qu’ il èst neûr èt qu’ on l’ fêt ovrer ! Si ç’ n’ èst nin målèreûs !...

Turtos dès-ènocints catwaze !... Dès grands vantrins sins cowète,

qu’ ont pus’ di bètch qui d’ cou, qui n’ savèt rin di leûs at’nances

èt qu’ ont, pôr, rinoyî leû djônèsse... Dès «grozès hanètes» qu’ ont

pièrdou l’ gos’ dès p’tits boneûrs dèl vicårèye...

Hanscroufe, in-èsclåve ? N’ a nou risse !... C’ èst vos-ôtes, lès

«gros bonèts», qu’ è-st-èsclåves di vos bwègnes contes !... Qui dè

contrêre ! Nosse Hanscroufe, il èst libe ! Il èst libe, lu ! Libe dè fé

l’ boneûr dès-èfants, todi sûr... Èt c’ èst çoula qui v’ grawe è vinte,

por mi...

Lès cis qui comptèt fé l’ Eûrôpe,

So lès crèyinces di nos-èfants,

Podrî leûs-manîres d’ arogant,

Il ont l’ cèrvê come dèl sirôpe.

Billet de Paul Henry Thomsin

Publié avec l'aimable autorisation de l'auteur