Li Vîle Tchapèle di Hovémont

Qwand d'ji t'rilouque bonne vîle tchapèle
Tot fant qu'ti n'a l'air di wèd'tchwè
Dj'a lè pinse, qui mi àme si troubèle,
Et chal à coûr dji r'sins'ne saqwè
Ti n'a nole grande tour qui s'ènode
Mins, t'ès tote simpe tot come li ci
Qui n'aveût qu'on stà po dwermi
Qwan c'est qui v'na po sàver l'monde

Avinante tchapèle
Oûve di nos tayons
Ti m'avisse pus bèle
Dizeu Hovémont
Qui l'pus ritche èrlique
Ca dj'inme dè vèyi
Tès vis meûrs di briques
Et ti p'tit cloki

T'as k'nohou les djôyes èt lès pones
Totes les rabrouhes di nos bon vis
Qui t'hàbitit dèdja tot djones
Qwant l'avit'ne pone a-z-aswadjî
N'est-ce nin so tès bancs sins poyires
Qui nos grands méres, a tot côps bon
Vinît qwèri l'consolàcion
Qu'on troûve tofer divins'ne priyîre?

T'as vèyou l'timp qu'on v'néve à mèsse
Les pîds tchàssîs d'vins dès sabots
Et quon s'trûméve qwand c'èsteût l'fiesse
Li neûre calote èt l'bleû sàro
Oûy, ti n'veûs minme pus nole gàmète
Li môde askût dis'qu'às pus vis
Mins twè: ti d'meûre la sins candji
Come li portrait dè cis qu'on r'grète!

(Auguste Boon) (Deûzinme Bouquèt)